ஞானக்களஞ்சியம் கவிகள் - விளக்க உரை

30-06-2018

*ஞானக் களஞ்சியம் கவிகள்*
*- வேதாத்திரிய தத்துவ விளக்க உரைகள்*

*குருவணக்கம்*

*அருள்துறைக்கு நேர்வழி (12-10-1987)*

*கவி: 4*

முட்டைக்குள் அமைந்தகரு உடலாலும் உயிராலும் வளர்ச்சி பெற்றால்

   மூடிய ஓடுடைந்துவிடும்; குஞ்சு வெளிஉலகைக் கண்டின்பம் துய்க்கும்;

திட்டமிட்டு அறம் ஆற்றித் தூய்மை அறிவில் உடலில் பெற்று விட்டால்

    தீரும்வினை; புலன்மயக்கம் தாண்டிடலாம்; தீய வினைப்பதிவு எல்லாம்

விட்டுவிடும்; விளைவாக வீடுபேறெனும் அறிவையறிதல் கிட்டும்.

   வினைப்பயனைப் போக்காமல் வீட்டையடைய விரும்புவதோ பொருந்திடாது.

தட்டுங்கள் திறக்குமென்றார் தனக்குள்ளேயே பேராற்றல் புதையல்கண்டோர்

   தக்கவழிஅருட்குருவின் தாள்பனிந்து தவம்பயின்று தனை உணர்தல்.

*தத்துவஞானி வேதாத்திரி மகரிசி*

 அண்டம் என்றால் பேரியக்க மண்டலம் எனும் பிரபஞ்சத்தில் உள்ள கோள்கள் ஆகும். எண்ணிலடங்காத கோள்களில் ஒன்று புவி அண்டம் எனும் பூவுலகம். இந்த உலகம் தோன்றி சுமார் 450 கோடி ஆண்டுகள் ஆவதாகவும் முதல் உயிரினம் என்று கூறப்படும் அமீபா, ஒரு செல் நீர்வாழ் ஜீவன் தோன்றி சுமார் 57 கோடி ஆண்டுகள் ஆவதாகவும், முதல் மனிதர் தோன்றி சுமார் 65 லட்சம் ஆண்டுகள் ஆவதாகவும் ஆராய்ச்சியாளர்கள் கூறுகிறார்கள். இறைநிலையானது தன்நிலையில் மாற்றம் பெற்று பிரபஞ்சத் தோற்றமாகியதில் சடப்பொருட்களில் அதன் தன்மையாகவும், சீவ இனங்களில் மனமாகவும், மனிதனில் ஆறாவது அறிவாகவும் மலர்ச்சி பெற்றுள்ளது.

 முதல் மனிதரிலிருந்து இன்றுள்ள மனிதன்வரை சங்கிலித்தொடர் போல, எங்கேயும் விட்டுப் போகாமல் வித்தின் வழியே மனிதகுலம் வந்து கொண்டுள்ளது. பல கோடிப் பிறவி எடுத்த மனிதர்க்கு உயிரின் நிலை என்ன? கடவுள் யார்? அல்லது எது? என்ற கேள்விகள் எழுவது இயல்பு. காரணம், தனது மூலத்தை அறிய விரும்பும் உயிரின் எழுச்சியேயாகும். சரியான வழிகாட்டல் வழிநடத்தல் இருக்குமேயானால், தன்னையும் அறியலாம் எல்லாவற்றையும் அறியலாம். தன்னை அறிதல் என்றால் சரியான குருவின் மூலம் உபதேசம் பெற்று தவத்தின்மூலம் மனதை அறியலாம்.

 மனம் என்பதோ இன்ப, துன்ப உணர்வுடையது. அதனைக்கடக்க மனதை ஓர்மை நிலைக்குக் கொண்டுவர வேண்டும். மனதிற்கு மூலமாயிருப்பது உயிர். ஆகவே மனதை அமைதி நிலைக்குக் கொண்டுவர உயிர்மேல் மனம் செலுத்துவது என்ற செயல் தவம், தியானம், யோகா, மெடிடேசன் என்ற வார்த்தைகளால் பேசப்படுகிறது. உயிரை உணர்ந்த பெரியார்கள் சிறப்பாக உயிரை குண்டலினி என்றனர். உயிர்ச்சக்தியை குண்டலினி சக்தி என்றனர். தியானத்தின்மூலம் உணரும்போது, நிலையில் அறிவாக இருப்பதே அலையில் மனமுமாக இருக்கிறது. அந்த அறிவுதான் தெய்வம். அது எல்லாவற்றிலும் நீக்கமற அன்பாக உள்ளதை, உணர்த்திய குருவும் தெய்வமே என்ற விளக்க, எல்லாவற்றையும் உணர்த்தவல்லது

*விளக்க உரை: மு.நி.பேரா. இரா.மாரியம்மாள் மோகன்தாஸ்*
வேதலோக அன்பு நிலையம் அறக்கட்டளை
K.Pudur MVKM Trust. Madurai
www.facebook.com/vethathiri.gnanam

தினம் ஒரு மாற்றம் (30/06/2018)

வாழ்க வையகம்!
வாழ்க வையகம்!
வாழ்க வளமுடன்!!

*தினம் ஒரு மாற்றம்* (30/06/2018)

குறள்:262

தவமும் தவமுடையார்க்கு ஆகும் அவம்அதனை
அஃதிலார் மேற்கொள் வது.

குறள் விளக்கம்:

உறுதிப்பாடும், மன அடக்கம் உடையவருக்கே தவத்தின் பெருமை பொருந்துவதாகும்; எனவே கட்டுப்பாடான ஒழுக்கம் இல்லாதவர்கள், தவத்தை மேற்கொள்வது வீண் முயற்சியாகும்.

(கேள்வி - பதில்)

1) தவம் மட்டும் செய்து தற்சோதனை செய்யாமல்  ஒருவர் தன்னை மேன்மை பெற முடியுமா??

2) தற்சோதனை செய்து தன்னை தூய்மை செய்து கொள்ள வேண்டும் என்ற எண்ணம் உள்ளவருக்கு தவம் எந்த வகையில் பலன் கொடுக்கும்?

பதில்:

1) தன்னை திருத்தி தன்னை தூய்மை செய்து கொள்ள வேண்டும் என்கிற தற்சோதனை இல்லாத தவம் மேன்மை பெறச் செய்யாது.

தத்துவத்தை தத்துவமாக படித்து எடுத்துரைக்க முடியுமே தவிர, அந்த இயல்பான தவ உணர்வை  உணர முடியாது.

அந்தந்த நுண்ணிய அலைச்சுழல் விரைவை தக்க வைக்க, தற்சோதனையில் மேன்மை அடைந்து பேரன்புடன் மனவிரிவுடன் தவத்தில் பிரகாசிக்க முடியும்.

2) ஒருவரது எண்ணம் சங்கல்பமாக வைக்கும் போது தவத்தில் அதற்குத் தான் வலிமை கூடுகிறது.

தன்னைத் தகுதி படுத்திக் கொள்ள ஒருவர் முனையும் போது, தற்சோதனை செய்தும், செயலை தூய்மை செய்தும், தவத்தில் ஆழ்ந்து செல்லும் போதும், தவம் மற்றும் தற்சோதனை ஒருவரை மேன்மை அடையச் செய்கிறது.

எண்ணத் தூய்மையே எல்லாவற்றிற்கும் வழிவகை செய்யும். மனவிரிவு பெற முடியும்.

அன்புடன் ஜெ.கே

தினம் ஒரு மாற்றம் (29/06/2018)

வாழ்க வையகம்!
வாழ்க வையகம்!
வாழ்க வளமுடன்!!

*தினம் ஒரு மாற்றம்* (29/06/2018)

உலகில் அனைத்தும் இறையாற்றலின் பரிசு தான்.

மனிதப் பிறவி என்பதும் அதுவே.

பிறப்புக்கும் இறப்புக்கும் இடையில் தான் வாழ்க்கைப் பயணம்.

அந்தப் பயணத்தை இனிமையாக கடக்க அனைத்தையும் சாதிக்கவும் தெரிய வேண்டும். சவால்களை எதிர்கொள்ளவும் கற்றுக் கொள்ள வேண்டும். நிறைய விஷயங்களை சகித்துக் கொள்ளவும் வேண்டும். சில விஷயங்களை தியாகம் செய்ய வேண்டும். சிலவற்றிற்கு விட்டுக் கொடுத்துப் பழகவும் வேண்டும்.

எல்லாமே இருந்தால் தான் குடும்பமும் சரி, வெளி உலகிலும் சரி சமாளிக்க முடியும்.

தன்னை ஒருவர் தனது தவற்றை உணர்ந்து தூய்மை செய்ய முனையும் போது, *தியானம்* பழகினால் மேலே கூறியவை அனைத்தும் சாத்தியமே. பழகாவிட்டால் நம் மன அலைச்சுழல், நம் மனது நம் கட்டுப்பாட்டில் ஒரு நேரம் போல் ஒரு நேரம் இருக்காது.

ஒருவரின் நிறைகுறைகள் அவரது பண்பிலேயே தெரியும். அனைவரும் இறைவனின் தன்மாற்றமே.

அனைவரும் அனைவரையும் கடவுளைப் போல் நினைக்க மனம் வராது. ஏனென்றால் பழக்கப்பதிவு. தான் என்கிற தன்முனைப்பும்  காரணம்.

மாற்றம் பிறரிடமிருந்து வராது. தன்னிடம் இருந்து தான் செயலாக்க  முடியும்.

தவறு செய்பவர்களை மன்னிக்கும் குணமும்
, மனவிரிவும் யாரிடம் இருக்கும்??  மனவிரிவும் பெருந்தன்மையும் உள்ளவர்களுக்கே சாத்தியம்.

குறள் எண் : 303
மறத்தல் வெகுளியை யார்மாட்டுந் தீய
பிறத்தல் அதனான் வரும்.

குறள் விளக்கம்
மு.வ : யாரிடத்திலும் சினம் கொள்ளாமல் அதை மறந்து விட வேண்டும், தீமையான விளைவுகள் அச் சினத்தாலேயே ஏற்படும்.

விட்டுக்கொடுத்தல் பல சிக்கல்களை தவிர்க்கும். அன்பே சிவம்.

அன்புடன் ஜெ.கே

தினம் ஒரு மாற்றம் (28/06/2018)

வாழ்க வையகம்!
வாழ்க வையகம்!
வாழ்க வளமுடன்!!

*தினம் ஒரு மாற்றம்* (28/06/2018)

எந்த ஒன்றுமே அடக்கமாக இருந்து ஆற்றலை வெளிப்படுத்துவதில் தான் அதற்கு மதிப்பு அதிகம் கூடுகிறது.

அடக்கம் என்பது அடக்கமாக இருக்கும் வரையே அதற்கு மதிப்பு.

இந்த வெளியில் அனைத்தும் அடக்கமாக இருப்பது போல், பூமிக்குள் பஞ்சபூத கூட்டு அடக்கமாக இருப்பது போல், கடலுக்குள்  நீர் அடக்கமாக இருப்பது போல்,
மண்ணுக்குள் விலை மதிப்பற்ற செல்வம் அடக்கமாக இருப்பது போல், காந்தம் ஒவ்வொன்றிலும் ஒவ்வொரு அலைகளை அடக்கமாக வெளிப்படுத்துவது போல்,
மனிதனுக்குள் இறைவன் அடக்கமாக இருந்து காந்தத் தன்மையில் அறிவாற்றலாக, இறைசக்தியை உணரக்கூடிய தன்மையை உணரப் பெற்றிருக்கிறான் மனிதன்.

அதன் ஆற்றலை புரிந்த மனிதனும் அடக்கமாக இருந்தால் மட்டுமே அவனின் மதிப்பு கூடும். தன்னிலையை அறிய முடியும்.

மனிதன் அதை உணர்ந்து விழிப்புணர்வில் செயலாற்றும் போது இறைவனே துணை இருந்து அத்தனை செயல்களுக்கும் நல்விளைவை தருவார்கள் என்பதில் மாற்றுக்கருத்து ஏதும் இல்லை.

'ஒருமையுள் ஆமைபோல் ஐந்துஅடக்கல் ஆற்றின்
எழுமையும் ஏமாப்பு உடைத்து.'
- திருக்குறள்.

பொருள்: ஒரு பிறப்பில், ஆமைபோல் ஐம்பொறிகளையும் அடக்கியாள வல்லவனானால், அஃது அவனுக்குப் பல பிறப்பிலும் காப்பாகும் சிறப்பு உடையது. 126

அன்புடன் ஜெ.கே

சாந்தி தவம் - மனவளக்கலை தவங்கள்

ஞானக்களஞ்சியம் கவி - விளக்க உரை

29-06-2018

*ஞானக் களஞ்சியம் கவிகள்*
*- வேதாத்திரிய தத்துவ விளக்க உரைகள்*

*கவி: 3*

அழுத்தம்எனும் உந்தாற்றல் ஒன்றைக் கொண்டே
 அணுமுதலாய் அண்டகோடி அனைத்தும் ஆக்கி
வழுத்துமோர் அறிவுமுதல் ஐந்தும் ஆறும்
 வகைவகையாம் உயிரினங்கள் தோற்று வித்து,
முழுத்திறனுடன் காத்து, முடிக்கும் மேலாம்
 முழுமுதற் பொருளே நம்மறிவாய் ஆற்றும்
பழுத்தநிலை வரும்வரையில் “நீ நான்” என்போம்
 பதமடைந்தோம்; ஒன்றானோம்; பரமானந்தம்.  (05.09.1983) 

*தத்துவஞானி வேதாத்திரி மகரிசி*

 இறைநிலையானது இப்படித்தான் இயங்கவேண்டுமென்ற தன் அறிவாலும், தனது ஆற்றலாலும் எழுச்சிபெற்ற பிரபஞ்சத் தோ’ற்றப் பொருட்களாகத் தன்நிலையில் மாற்றம் பெற்றுள்ளது. இறைநிலையின் மாபெரும் ஆற்றல் என்பது அழுத்தம் ஆகும். அந்த அழுத்தம் தன்னிலே, தன்னையே இறுக்கிக் கொள்ளும் ஆற்றலாகவும், மற்றவற்றில் சூழ்ந்தழுத்தும் ஆற்றலாகவும் உள்ளது. தனது மாபெரும் உந்து ஆற்றலால் தன்னையே இறுக்கிக் கொள்ளும்போது, நெருக்கமுற்று, பிதுக்கமுற்று, நொறுங்கித் தூசுகள் போல தனக்குள்ளாகவே மிதந்து கொண்டிருக்கிறது. தானாக இருந்தபோது தன்னிறுக்க ஆற்றலாயிருந்தது. பிறிதொன்றாகிய தூசுக்களைச் சூழ்ந்து அழுத்துவதால் சுழல ஆரம்பிக்கிறது. தற்சுழற்சியுடைய தூசுத்துகள்கள் எனும் இறைத்துகள்களை முன்னோர்கள் பரத்தில் தோன்றிய அணு என்பதால் பரமாணு என்றனர்.

 பரமாணுக்கள் இறைநிலையின் தன்னிறுக்கச் சூழ்ந்தழுத்தும் ஆற்றலால் நெருங்கும்போது கொத்தியக்கமாக ஆயிரமாயிரம் துகள்கள் சேர்ந்து இயங்கும் அமைப்பு விண் எனப்படும். விண்ணிற்குள் சிறைப்பட்ட இறைத்துகள்கள் தற்சுழறிச்சியாயிருப்பதால், இறைநிலையின் அழுத்தத்தால் கனமானவை மையம் நோக்கித் தள்ளப்பட்டு, லேசானவை வெளித்தள்ளும் சக்தியாவதால், விலக்குமாற்றல் காரணமாக, ஒரு சுழற்சியோடு மற்றொரு சுழற்சி ஒருபோதும் ஒட்டிக்கொள்ள முடிவதில்லை. இறைநிலையில் உராய்ந்து சுழல்வதால் ஏற்படும் தள்ளல் கொள்ளல் சக்தி காந்தம் எனப்படுகிறது. விண்ணும் சுழல்வதால் அதனுள்ளேயிருந்து காந்தம் விரிவலையாகி வெளித்தள்ளும் சக்தியாகிறது.

 அதன் திணிவு குறைவதால் வேகம் அதிகமான விண் நெருங்கி இயங்க வாய்ப்பேற்படுவதால், விண்ணும் இறைநிலையும் குறிப்பிட்ட விகிதாச்சாரத்தில் இணையும் நிகழ்ச்சி பஞ்சபூதங்கள் எனப்படுகிறது. பஞ்சபூதங்களும் ஒன்றிணைந்து எண்ணிலடங்கா கோள்களை உள்ளடக்கிய பிரபஞ்சத் தோற்றமாகியது. ஐந்து பௌதீகப் பிரிவுகளும் குறிப்பிட்ட விகிதாச்சாரத்தில் இணைந்து ஒன்றை ஒன்று காக்கும்படியான அமைப்பில் காந்தச் சுழலும் கருமையமும் அமைந்து ஜீவன் என்ற நிலை பெற்று ஓரறிவு தாவரம் முதல் ஆறாவது அறிவு பெற்ற மனிதன்வரை தன்னிலையில் மாற்றம் பெற்றுள்ளது.

 இறைநிலை முதல் மனித மனம் வரை அறியும் அறிவு, மனிதனிலே பகுத்தறிவாக உள்ளது. உண்மைப் பொருளான அறிவே, மேன்மைப் பொருளான மனமாக மனிதனிலே மலர்ந்துள்ளது என்பதை உணரும்வரை, எல்லாவற்றையும் தன்னிலேயிருந்து வேறுபடுத்தித்தான் மனிதன் பார்ப்பான். சிற்றறிவை பேரறிவிலே லயமாக்கும் நிலையடையும்போது, பரமே அந்தமாக, முடிவாக இருப்பதை உணர்வான்.

*விளக்க உரை: மு.நி.பேரா. இரா.மாரியம்மாள் மோகன்தாஸ்*
வேதலோக அன்பு நிலையம் அறக்கட்டளை
K.Pudur MVKMM Trust. Madurai
www.facebook.com/vethathiri.gnanam

ஞானக்களஞ்சியம் கவிகள் - விளக்கஉரை

ஞானக் களஞ்சியம் கவிகள் - வேதாத்திரிய தத்துவ விளக்க உரைகள்

இறைவணக்கம்
கவி: 1
ஆதியெனும் பரம்பொருள்மெய், எழுச்சிபெற்று
 அணுவென்ற உயிராகி அணுக்கள்கூடி
மோதியிணைந்து இயங்குகின்ற நிலைமைக் கேற்ப
 மூலகங்கள் பலவாகி அவையிணைந்து,
பேதித்த அண்ட கோடிகளாய் மற்றும்
 பிறப்பு இறப்பிடை உணர்தல் இயக்கமாகி,
நீதிநெறி உணர் மாந்தராகி , வாழும்
 நிலையுணர்ந்து தொண்டாற்றி இன்பம் காண்போம். 1955

தத்துவஞானி வேதாத்திரி மகரிசி

 ஆதி என்றால் அதற்கு முன்னதாக என்று கூறுவதற்கு எதுவுமில்லை. எனவே அனாதி எனலாம். பரம் என்றால் அதைவிடப் பெரியதுமில்லை. நுண்ணியதுமில்லை. பொருள் என்றால், எது நீடித்ததோ, நிலைத்தோ, மாறாததோ அதுவே உண்மைப்பொருள் சத்தியப்பொருள். மெய் என்றால் உடலென்ற பொருளும் வரும். உண்மை என்ற பொருளிலும் பயன்படுத்துகிறோம். நாம் சாதாரணமாகத் தோற்றப் பொருட்களையே பொருள் என்று கூறிப் பழகியுள்ளோம். அதனால்தான் வள்ளுவரும் “பொருள் அல்லவற்றைப் பொருள் என்று கூறும் மருளானாம் மாணாப் பிறப்பு” என்கிறார்.
 ஆதியாகிய, மெய்ப்பொருள், இப்படித்தான் இயங்கவேண்டும் என்ற தன் அறிவாலும், தனது ஆற்றலாலும் இருப்பாக இருந்தது எழுச்சி பெற்று, இயக்க மலர்ச்சியில் அணு என்ற உயிராகியது. மெய் அசைந்தால் அது உயிர், அணுக்கள் நெருங்கி இயங்கும்போது மூலகம் என்ற நிலையில் நிலம், நீர், நெருப்பு, காற்று எனும் பௌதீகப் பிரிவுகளாகி, பௌதீகப் பிரிவுகள் இணைந்து எண்ணிலடங்காத கோள்களை உள்ளடக்கிய பேரியக்க மண்டலமாகியது. எண்ணிலடங்காத கோள்களில் ஒரு கோள் ஆகிய நிலவுலகத்தில் 5 பௌதீகப் பிரிவுகளும் குறிப்பிட்ட விகிதாச்சாரத்தில் இணைந்து ஒன்றையொன்று காக்கும்படியான அமைப்பில் காந்தச் சுழலும் கருமையமும் அமைந்த போது, சடமாக இருந்தது ஜீவன் என்ற நிலையில் மலர்ச்சி பெற்றது.
 உணர்தல் என்ற சிறப்பில் ஓரறிவு முதல் ஆறறிவு வரை தன்நிலையில் மாற்றம் பெற்றது. இயற்கை நியதியை அறிந்து தெளிந்து ஆறாவது அறிவு பெற்ற மனிதர், வாழ்வின் நோக்கத்தையும், பிறவியின் நோக்கத்தையும் உணர்ந்து ஒத்தும் உதவியும் இனிமயாக வாழ்வோம்.
 மெய்யியல், விண்ணியல், பிரபஞ்சவியல், உயிரியல், மானுடவியல் ஆகிய அனைத்து அறிவியலும் இணைந்துள்ள சுருக்கமான விளக்கத்தை இந்த இறைவணக்கக் கவி உணர்த்துகிறது.

விளக்க உரை : இரா. மாரியம்மாள் மோகன்தாஸ்
வேதலோக அன்பு நிலையம் அறக்கட்டளை
www.vethaloka.org
K.Pudur MVKAMM Trust, Madurai
www.facebook.com/vethathiri.gnanam

ஞானக்களஞ்சியம் கவிகள் - விளக்கஉரை

28-06-2018

ஞானக் களஞ்சியம் கவிகள்
- வேதாத்திரிய தத்துவ விளக்க உரைகள்

*மெய்ப்பொருள் பூஜ்ஜியம்*

*கவி: 2*

எல்லாம்வல்ல தெய்வமது;
எங்கும் உள்ளது நீக்கமற;
சொல்லால் மட்டும் நம்பாதே;
சுயமாய் சிந்தித்தே தெளிவாய்!
வல்லாய் உடலில் இயக்கமவன்;
வாழ்வில் உயிரில் அறிவுமவன்;
கல்லார் கற்றார் செயல்விளைவாய்க்
காணும் இன்பதுன்பமவன்.

அவனின் இயக்கம் அணுவாற்றல்,
அணுவின் கூட்டுப் பக்குவம்நீ!
அவனில்தான் நீ! உன்னில் அவன்!
அவன் யார்? நீயார்? பிரிவேது?
அவனை மறந்தால் நீ சிறியோன்;
அவனை அறிந்தால் நீ பெரியோன்;
அவன் நீ ஒன்றாய் அறிந்த இடம்,
அறிவு முழுமை அது முக்தி. (1973 ஜனவரி)

*தத்துவஞானி வேதாத்திரி மகரிசி*

 மனிதனால் செய்ய முடியாததையெல்லாம் செய்யக்கூடிய மாபெரும் ஆற்றல் மனிதனிலிருந்து இயங்குகிறது. பிரபஞ்சத்தையே இயக்குகிறது. அவ்வாற்றலை சிந்தனைவாதிகள் இயற்கை என்கிறார்கள். விஞ்ஞானிகள் பிரபஞ்ச ஒருங்கிணைப்பு ஆற்றல் என்கிறார்கள். மெய்ஞானிகளாகிய     தத்துவவாதிகள் தெய்வம் என்கிறார்கள். அது அங்கு, இங்கு என்று இல்லாமல் எல்லா இடங்களிலும், எல்லாப் பொருட்களிலும், எல்லா இயக்கங்களிலும் எல்லா விளைவுகளிலும் குறைவில்லாமல் நீக்கமற நிறைந்துள்ளது என்று முன்னோர்கள் கூறியுள்ளதைக் கேட்டு, அதையே மற்றவர்களுக்கும், பிற்காலத்தவர்களுக்கும் சொல்லிக் கொண்டிருக்கிறோம்.

அவ்வாறு கூறுவதற்குக் காரணமாயிருக்கும் அறிவை சிந்தனை மூலமாக உணர்ந்து தெளிவடைய வேண்டும். சிந்தனையானது மன அமைதியிலும், ஓர்மையிலும்தான் வரும். வலிமையான உடலை இயக்குவதும், உயிராக இயங்குவதும், அறிவாக உணர்வதும் அதே தெய்வம்தான் என்பதை உணரலாம். இயக்குவது அறிவு. இயங்குவது உயிர். உணர்வது மனம். இவையெல்லாம் எல்லைகட்டிய உடலுக்குள் இருப்பவை. இவற்றைப் பற்றியெல்லாம் கற்றவர்களாயிருந்தாலும், கற்காதவர்களாக இருந்தாலும், அவர்களின் செயல்பாடுகளில் மலரும் விளைவு இன்பம் அல்லது துன்பம் என்பது தெய்வ நியதியாகும்.

 பிரபஞ்சம் முழுவதும் இருப்பாக உள்ள தெய்வம், தன் ஆற்றலால் இப்படித்தான் இயங்க வேண்டும் என்ற இயல்பூக்கமாகிய அறிவால் அணுக்களாகி அவைகள் கூடிய கொத்தியக்கம்தான் சடப் பொருட்களாகவும், ஜீவன்களுமாகத் தன்நிலையில் மாற்றம் பெற்றுள்ளது. ஆகவே உனக்குள்ளாக தெய்வமும், தெய்வத்திற்குள்ளாக நீயும் இருப்பதை உணரும்போது, தெய்வமும் நீயும் பிரிவற்ற நிலையில் ஒன்றாகிவிட முடியும். தெய்வநிலையை நீ மறந்தபோது, மனிதன் என்ற சிறிய நிலையை அடைகிறாய். தெய்வத்தோடு இணைந்திருக்கும்போது நீயும் அதே நிலையையடைவதால் பெரியோன் ஆகிறாய். சிற்றறிவைப் பேரறிவோடு இணைக்கும்போது எல்லாப் பொருட்களிலும் தன்னையும் தன்னில் எல்லாப் பொருட்களையும் உணரலாம், அந்நிலை கைவரப் பெற்றால், அதுவே முக்தி, மோட்சம், முழுமைப்பேறு ஆகும். இதுவே மனிதப் பிறவியின் நோக்கமும் உரிமையும் ஆகும்.

*விளக்க உரை: மு.நி.பேரா. இரா.மாரியம்மாள் மோகன்தாஸ்*
வேதலோக அன்பு நிலையம் அறக்கட்டளை
K.Pudur MVKMM Trust. Madurai
www.facebook.com/vethathiri.gnanam

பஞ்சபூத நவகிரக தவம் - மனவளக்கலை தவங்கள்

மனவளக்கலை ஓர் அறிமுகம் - வீடியோ

தினம் ஒரு மாற்றம் (27/06;2018)

வாழ்க வையகம்!
வாழ்க வையகம்!
வாழ்க வளமுடன்!!

*தினம் ஒரு மாற்றம்* (27/06/2018)

திருக்குறள்
"நயனொடு நன்றி புரிந்த பயனுடையார்
பண்புபா ராட்டும் உலகு."*

விளக்கம்:
நீதியையும் அறத்தையும் விரும்பிப் பிறர்க்கும் பயன்படுபவரின் பண்பினை உலகத்தவர் சிறப்பித்துப் பேசுவர்.

Explanation:
The world applauds the character of those whose usefulness results from their equity and charity
❕❕❕❕❕❕❕❕
பிறர் மாற வேண்டும் என்றே ஒருவர் நினைக்கிறார்.

*நான் நினைச்சது மத்தவங்க செய்யணும்.. கேக்கணும்.. அப்படின்னு...*

ஆனால் நினைப்பில் அது எதிர்பார்ப்பு ஆகிவிடுகிறது..

அந்த எண்ணம் நடக்க அதற்குரிய தகுதி பெற்றிருக்க வேண்டும். ஆனால் அப்பொழுதும் அதிகாரம் ஆணவமாக மாற அனுமதிக்கக் கூடாது.

சொல்வதை அதிகார தொணியில் சொல்லாமல், அன்புடன் சொல்வதையே அனைவரும் எதிர்பார்ப்பார்கள்.

அதிகாரம் என்பது பேச்சில் இல்லாமல் பதவியில் மட்டுமே இருப்பது நலம்.

அப்பொழுது தான்   மதிப்பு என்பது தானாக, அதிகாரத்தில் உள்ளவருக்கு வரும்.

பேச்சில் இனிமை எல்லாவற்றிலும் காட்ட வேண்டுமா??

ஆம். அதுவே அனைத்து பண்பு நலன்களை பெற்றுத் தரும்.

அனைத்து செயல்களிலும், நன்மை தனக்கும் அளித்து, பிறருக்கும் அளித்து,  வேலை செய்பவர்களும் தன்னைப் போன்று மனிதன் என்று மதிப்பளித்து பாரபட்சம் இல்லாமல் வாழ்ந்தால் தரத்திலும், பண்பிலும் ஏற்றம் மிகும்.

அன்புடன் ஜெ.கே

தினம் ஒரு மாற்றம். (20/06/2018)

வாழ்க வையகம்!
வாழ்க வையகம்!
வாழ்க வளமுடன்!!

*தினம் ஒரு மாற்றம்* (20/06/2018)

ஒரு சாலையை நடந்து கடக்கும் போது இரண்டு பக்கமும் திரும்பிப் பார்க்கிறோம்...
ஏன்?? தன்னுடைய குறுக்கீட்டினால் பிறருக்கும், தனக்கும், பாதிப்பு வராமல் இருக்கவும், தனது உயிரை.. *தான்* மட்டுமே பாதுகாப்பாக பார்த்துக் கொள்ள முடியும் என்பதும் தான் காரணம்.

இந்த இரண்டு விஷயங்களை யார் யோசிக்கிறார்களோ, அவர்களால் பெரும்பாலும் பிறருக்கும் தனக்கும் நன்மையே விளையும்.. இது விழிப்புணர்வினால் வரும் சிந்தனை தான்.

இப்படி எல்லாவற்றிலும்.. சுய பாதுகாப்பும், சுய சிந்தனையும், இருந்தால் எப்பொழுதும் சமுதாய நலன் நல்லபடியே இருக்கும்.

*"அருட்பேராற்றல் கருணையினால் உடல்நலம் நீளாயுள் நிறைசெல்வம் உயர்புகழ் மெய்ஞானம் ஓங்கி வாழ்க!"*

இதை தன் வாழ்த்து என்று கூறுவார்கள். ஒவ்வொருவரும் தவத்தின் நிறைவில் முதல் சங்கல்பமாக தன்னையே மனக்கண் முன் கொண்டு வந்து சுய சங்கல்பம் செய்யும் பொழுது, தனது உடல், உயிர், மனவளம், நிறைவு எல்லாமே  அடங்கி விடுகிறது.

ஏன் *ஓங்கி* வாழ்க என்று சொற்களை இங்கு பயன்படுத்தி இருக்கிறார்கள் மகரிஷி அவர்கள்??

எல்லாமே மனிதனுக்குள்  இறைவனே அடக்கமாக இருப்புநிலையாக, அறிவாற்றலாக உள்ளார் என்பதும், ஒன்றை கேட்டுத் தான்ப் பெற வேண்டும் என்பதில்லை என்பதும் தான் பொருள். தானாகவே இயல்பாகவே இருப்பதை ஊக்குவித்தால் போதும்.. அதுவே  ஓங்கி வாழ உள்ளுணர்வே அளிக்கும் என்று பொருள்..

ஆகவே தான் இந்த *தன் வாழ்த்து* என்பதை சொற்களின் பயன்பாட்டை கூட்டவோ, குறைக்கவோ, வேண்டாம் என்றும் கூறுகிறார்கள்.

ஒவ்வொரு அக்ஷரத்திற்கும் ஒவ்வொரு அதிர்வு உண்டு.  அதற்கு நமது
*வாழ்க வளமுடன்*   என்ற வாழ்த்து மட்டுமே போதும்.

தமிழ் மொழியின் அதிஅற்புதமே இதன் அக்ஷரங்களின் அதிர்வலையும் அதன் ஊடுருவும் தன்மையும் தான்.

எப்பொழுதும் பயன்படுத்தும்... ஒவ்வொரு சொற்களுக்கும் அதிர்வலை உண்டு.

அதை நேர்மறையாகவும், இனிமையானதாகவும் சொற்களை பயன்படுத்தினால், அனைவருக்கும் நலம் விளைவிக்கும். *வாழ்க வளமுடன்* மந்திரச் சொல்லுக்கும் அதே போல் அலைஅதிர்வு அதிகம்.

அதை உணர்ந்து அனைத்தையும், அனைவரையும் வாழ்த்தி ஒற்றுமையுடன் நல்லிணக்கத்துடன் வாழ்வோம்.

அன்புடன் ஜெ.கே

தினம் ஒரு மாற்றம் (26/06/2018)

வாழ்க வையகம்!
வாழ்க வையகம்!
வாழ்க வளமுடன்!!

*தினம் ஒரு மாற்றம்* (26/06/2018)
                       *குருவின் சேர்க்கை*

"எப்பொருளை எச்செயலை எக்குணத்தை
எவ்வுயிரை ஒருவர் அடிக்கடி நினைந்தால்
அப்பொருளின் தன்மையாய் நினைப்போர் ஆற்றல்
அறிவினிலும் உடலினிலும் மாற்றங் காணும்
இப்பெருமை இயல்பூக்க நியதி ஆகும்
எவரொருவர் குருவை மதித்து ஒழுகினாலும்
தப்பாது குருவுயர்வு மதிப்போர் தம்மைத்
தரத்தில் உயர்த்திப் பிறவிப்பயனை நல்கும்."
       *தத்துவஞானி வேதாத்திரி மகரிஷி*

அவரவர் எண்ணத்திற்க்கேற்ப எல்லாமே வாழ்க்கையில் அமைகிறது.

வாழ்க்கையில் ஒருவர் பிறருக்காக பிறர் நலனுக்காக செய்யும் செயலிலே மட்டுமே நிறைவு காண முடியும்.

அதிலே தான் மனநிம்மதி உள்ளது. ஆனால் அந்த செயலை செய்துவிட்டு,  இந்த உதவியை இவருக்காக செய்ததற்கு பின்னாளில் தனக்கு அந்த உதவி வேறு வழியில் அவரிடமிருந்து கிடைக்கும் என்று எதிர்பார்த்தால் அது பிரதிபலன் ஆகும். கடமையை செய்வதே ஒருவர் கடமை. அதற்கு விளைவு இறைவனே அளிப்பார். இறைநீதியும் அதுவே.

ஏனென்றால் அன்று அந்த உதவி அந்த நபருக்கு செய்ய இந்த நபரை நியமித்திருக்கிறார் கடவுள். அவ்வளவு தான்.

தன் உடல் என்பது  ஒரு கருவி அல்லது வாகனம் மட்டுமே என்பதில் அனைவரும் கவனம் செலுத்தி குருவை மதித்து வாழும் போது அனைத்து நலன்களும் தானாக வந்து சேரும் என்பதை அனுபவத்தில் உணர முடிகிறது.

உயர்பண்புகள் மேலும் உயர்கின்றது.

மேன்மை என்பது அனைத்து வகையிலும் உண்டு . ஒருவர் தன்னை நேசித்தும் பிறரை நேசித்தும் குருவை மதித்து வாழும் போதும் இயல்பாக உயர்வு வருகிறது.

அன்புடன் ஜெ.கே

அருட்தந்தை கேள்வி பதில்

26.06

*அன்பர்களின் கேள்விகளும் – அருட்தந்தையின் பதில்களும்*

 ❓ *கேள்வி:* அருள்தந்தை அவர்களே! சில சமயங்களில் ஒன்றுமறியாத மக்களும் போர் மற்றும் சமுதாய வினைகளால் பாதிக்கப்படுகிறார்களே ஏன்?

 ✅ *பதில்:* உண்மைதான். ஒவ்வொருவருடைய வாழ்வும் சமுதாய மக்கள் உழைத்து தரும் பொருட்களைக் கொண்டே நடைபெறுவதால், தனிமனித வினையானது சமுதாய வினையோடு இணைக்கப்பட்டே உள்ளது. போர் முதலிய காலங்களில் தனிமனித வினையும், சமுதாய வினையும் இணைந்தே செயல்படும். முடிவில் தனிமனித வாழ்க்கைக்குத் துன்பங்களும் ஏற்படுகின்றன.

வாழ்க வளமுடன்!!

*அருள்தந்தை தத்துவஞானி வேதாத்திரி மகரிஷி*

(நாளையும் தொடரும்)

அருட்தந்தை கேள்வி பதில்

25-06

அன்பர்களின் கேள்விகளும் – அருட்தந்தையின் பதில்களும்

 ❓ கேள்வி: சுவாமிஜி! எந்தப் பழிச்செயலையும், பாவத்தையும் அறியாத குழந்தைகளும் நோய் வாய்ப்பட்டுத் துன்பப்பட்டு இறக்கின்றனவே காரணம் என்ன?

 ✅ பதில்: வித்துவின் மூலம்தான் பிறவி உண்டாகின்றது. பெற்றோர்கள் வினைத்தொடரே பிள்ளைகள், அந்த வினைகள் குழந்தையின் கருமையத்தில் தங்கி உடலிலே நோயாக வருகிறது. குழந்தைகளுடைய துன்பம் குழந்தைகளுடைய கர்மத்தால் விளைவது அல்ல. ஆனாலும் குழந்தைகள் இதிலிருந்து தப்பிக்கவோ, தனித்தியங்கவோ இயலாது. இதுதான் உண்மையான இயற்கை நியதி ஆகும்.

வாழ்க வளமுடன்!!

அருள்தந்தை தத்துவஞானி வேதாத்திரி மகரிஷி

(நாளையும் தொடரும்)

அருட்தந்தை கேள்வி பதில்

கேள்வி : ஐயா, ஆங்காங்கே ஊர்களில் கோயில்கள் ஆயிரமாயிரம் கட்டியிருக்கிறோம். நாம் அதிலெல்லாம் பயன் கண்டு வருகிறோம். ஆனால் "அறிவுத்திருக்கோயில்" கட்டப்படுவதன் நோக்கம் என்ன?

மகரிஷியின் பதில் : உருவ வழிபாட்டிற்கான கோயில்கள் ஆயிரமாயிரம் கட்டியிருக்கிறோம். நாம் அதிலெல்லாம் பயன் கண்டு வருகிறோம். ஆனால் "அறிவுத்திருக்கோயில்" உலகத் தொடர்பாக வந்த ஆன்மீகப் பயணத்திலேயே ஒரு மைல் கல்லாக அமைந்துள்ளது. பல கோயில்கள் விக்ரக ஆராதனைக்காகக் கட்டப்பட்டிருந்தாலும் "கோயில்" என்பதன் அர்த்தத்தை அளிக்கக் கூடிய வகையில் அறிவுத்திருக்கோயில் கட்டப்பட்டிருக்கிறது. இதனால் பக்தி மார்க்கத்திலுள்ள விக்ரக ஆராதனைகளெல்லாம் பயனற்றது என்று கொள்ள வேண்டாம். அப்படிச் சொல்லவும் முடியாது. ஏனென்றால் மனிதன் எந்த உருவத்தை வணங்கினாலும் சரி, "தன் அறிவைக் கொண்டு வடிவெடுத்துத்தான் வணங்குகின்றான்".

இல்லங்களிலே ஒரு புரோகிதர் மூலமாக ஏதேனும் ஒரு சடங்கு செய்தாலும் ஒரு விநாயகர் உருவையோ அல்லது வேறு உருவையோ வைத்து முதலில் "ஆவாகயாமி" என்று சொல்வார்கள். எனது அறிவை அதில் வைக்கின்றேன் என்பது அதன் பொருள். முடிவில் "யதாஷ்டானம் பிரதிஷ்டாப்யாமி" என்று கூறுவார்கள். எங்கே இருந்து கொண்டு வந்தேனோ அறிவை, அந்த இடத்திலேயே கொண்டு போய்ச் சேர்த்து விட்டேன் என்பது இதன் பொருள். இதிலிருந்து என்ன தெரிகிறது? எந்த முறையில் இறைவணக்கத்தை நடத்தினாலும் நம் "அறிவைத்தான்" விரித்து அவ்வுருவாக்கி, அக்குணமாக்கி வணங்குகிறோம் என்பது விளங்குகிறதல்லவா?

"கடவுளை வணங்கும்போது கருத்தினை உற்றுப்பார் நீ
கடவுளாய்க் கருத்தே நிற்கும் காட்சியைக் காண்பாய் அங்கே"

என்று ஒரு கவியில் கொடுத்துள்ளேன்.

நீங்கள் அறிவுத்திருக்கோயிலுக்கு வந்து எளியமுறை உடற் பயிற்சி கற்று உடல்நலம் பெற்றும்; எளியமுறைக் குண்டலினி தவம் பயின்று மனவளம் பெற்றும்; சித்தர்களின் கலையான காயகல்பம் பயின்று கருமையத்தூய்மை பெறலாம். மேலும் மௌனம், அகத்தாய்வில் கலந்து குணநலப் பேறு பெற்றும் சிறப்பாக வாழ்வதோடு வீடுபேறும் அடையலாம்.
- தத்துவஞானி வேதாத்திரி மகரிஷி.

தினம் ஒரு மாற்றம் (19/06/2018)

வாழ்க வையகம்!
வாழ்க வையகம்!
வாழ்க வளமுடன்!!

*தினம் ஒரு மாற்றம்* (19/06/2018)

"தப்புக்கணக்கிட்டுத் தான் ஒன்று எதிர்பார்த்தால் ஒப்புமோ இயற்கை விதி?, ஒழுங்கமைப்புக்கேற்றபடி, அப்போதைக்கப்போதே அளிக்கும் சரி விளைவு,
எப்போதும் கவலையுற்று இடர்படுவார் இதை உணரார்".

*அருட்தந்தை வேதாத்திரி மகரிஷி அவர்கள்*

வீட்டில் உள்ளவர்களிடமும், வெளி உலகிலும் எதைப் பார்த்தாலும் நிறைவை பார்க்க மனம் வருகிறதா??

ஒரு வெள்ளைத் தாளில் கருப்புப் புள்ளி மட்டுமே இருக்கிறது. இதில் என்ன தெரிகிறது என்றால் வெள்ளை நிறமே எல்லா பக்கங்களிலும் தெரிகிறது என்று பதில் அளிப்பதில்லை. பதிலாக.  கருப்புப் புள்ளி இருப்பதையே சுட்டிக் காட்டத் தோன்றுகிறது..

ஏனென்றால் குறையை பார்த்தும், குறை பேசியும், பிறரை கேலி பேசியும் பழக்கப்படுத்திக் கொண்டு விட்டார்கள் ஒரு சிலர்.

நிறையை பார்க்க யார் மாற வேண்டும்?? மக்களா??
எதை மாற்ற வேண்டும்?? சமுதாயப் பழக்கத்தையா??

தன்னை ஒருவர் மாற்றிக் கொண்டாலே போதும்.. தன்னை மாற்றிக் கொள்ள வேண்டும் என்று ஒருவர் நினைக்க வேண்டும். அப்பொழுது தான் மாற்றம் நிகழும்..

நான் இப்படித் தான் இருப்பேன் என்று வாதிப்பவர்களால் அவர்களுக்கான மாறும்  கால நேரம் வரும் வரை காத்திருக்க வேண்டியது தான்..

அதுவே பிறவித் தொடராக தன்மாற்றம் பெறுகிறது.

மாறுவதற்கான சந்தர்ப்பத்தை இறைவன் அளித்துக் கொண்டுதான் இருக்கிறார்கள்.

ஆனால் ஈகோ என்கிற தன்முனைப்பு தடுக்கிறது.

தன்முனைப்பு என்கிற தலைக்கனத்தை  விட்டொழித்தால் தவிர மனதில் அமைதி நிலைக்குமா?? சுயமாகவே சிந்திக்க வேண்டும்.

இறைவன் ஒவ்வொருவருக்கும் கொடுக்கும் சந்தர்ப்பம் தான் இந்த மனிதப் பிறப்பு.

இப்பிறப்பில் தன்னை தூய்மை செய்யவும், தன்னை உணரவும் கடவுள் அளிக்கும் வாய்ப்பை கண்டதில் மனதை செலுத்தி தவறாக பயன்படுத்தினால் அதற்குண்டான பலனையும் அவரவரே அனுபவிக்க நேர்கிறது. இதுவே இறைநீதி.

உணவு உண்ட பின் உணவை சீரணிப்பது மனிதனா.? மனிதனுக்குள் இயங்கும் உறுப்புகளா?? அதன் அறிவாற்றலா??

ஆனால் சீரணாமாகிறது எப்படி??? மனிதன் அந்த வேலையைச் செய்யவில்லை என்பது மட்டுமே தெரியும். உணவை  உண்ணும் செயலை மட்டுமே செய்கிறான். சீரணித்து கழிவை வெளியேற்றும்  விளைவு எங்கிருந்து வருகிறது.. இறைநீதி அனைத்தையும் ஒழுங்காகவே செய்து கொண்டிருக்கிறது என்பதை உணர்ந்தால் மனிதன் அனைத்தையும்  மதித்து வாழ்வான்.

அன்புடன் ஜெ.கே

தினம் ஒரு மாற்றம் (18/06/2018)

வாழ்க வையகம்!
வாழ்க வையகம்!
வாழ்க வளமுடன்!!

*தினம் ஒரு  மாற்றம்* (18/06/2018)

தொலைக்காட்சியிலோ, அல்லது வானொலியிலோ அலைவரிசை இருக்கும். அந்தந்த அலைவரிசையில் அந்த சானல் ஒளி/ஒலிபரப்பாகும்.

மனம் என்பதும் அவ்வாறே.

நமது மனஅலைச்சுழல் விரைவு அமைதியாக வைத்திருக்கும் வரை, உணர்ச்சி நிலைக்கு செல்ல முடியாது.
ஆனால் மன அலைச்சுழல் விரைவு விநாடிக்கு 13 சுற்று அதிகமாகும் அல்லது தாண்டும் போது உணர்ச்சி மயமாகிறோம்.

உணர்ச்சி நிலையில் புலன் கவர்ச்சி, கோபம், கவலை, வார்த்தைகளின் பிரயோகம் எதுவும் தன்வயம் இழந்த நிலையிலேயே இருந்து செயல்படுவார்கள் ஒரு சிலர். கோபம் என்பது தனக்குத்  தானே இரத்தத்தில் விஷத்தை  ஊற்றிக் கொள்வது போல்.
தன்னையும் பாழாக்கி விடும். தன்னை சுற்றியுள்ளவருக்கும் மனம் புண்ணாகும். இது பல நோய்களை உருவாக்கும்.

மனத்தில் தேவையில்லாத விஷயங்களை அனுமதிக்க வேண்டாமே....

மனத்தில் எண்ணும் எண்ணங்கள் யாவுமே நல்ல எண்ணங்கள், தீய எண்ணங்கள் என்று தரம் பிரித்து வைத்து விடும்

எப்படியென்றால் வாங்கும் விலை உயர்ந்த பொருட்களுக்குக் கொடுக்கும் மதிப்பைப் போல,  ஒவ்வொருவரின் கருமையத்திலும் பிரித்து வைக்கப்படும்.

அந்த மன அலைச்சுழலில் தொடும் போது அந்த எண்ணம் எழுச்சி பெறும்..

அமைதியான மன அலைச்சுழலில்,
அனைவரையுமே சூழ்நிலை இருக்க வைப்பதில்லை தான்.. ஆனால் ஒருவரது மனத்தை அவரவர் கட்டுப்பாட்டிற்குள் வைக்க முடியும்.

"எண்ணம்சீவ காந்தத்தில் எழுகின்ற அலைநிலை எண்ணமதன் நிலைபொருள் இறைவனுண்மை தேறுவோம்.
எண்ணமொடு சொல்செயல் இம்மூன்று அலைகளை இறுக்கியும் சுருக்கியும் இருப்புவைக்கும் காந்தமே.

அருட்தந்தை வேதாத்திரி மகரிஷி அவர்கள்.
புத்தகம்: வாழ்க்கைவள உயர்வுப்படிகள் ஐந்து."
(பக்கம் 76)

அது தான் தியானமும், தற்சோதனையும்.
அனைத்தையும் நேசிக்கும் பண்பு இருந்தால் எதிலும் குறை காண முடியாது. நிறைவை மட்டுமே காண்பார்கள்.. அன்பு மட்டும் வளர்த்துக் கொண்டால் போதும்.

மன விரிவே பெருந்தன்மை குடிகொள்ளும்.

குறுகலான மனம்... விரிவடைவதற்கு தன்னுடைய அறிவினாலும், ஆற்றலினாலும், முயற்சியை மேற்கொள்ள வேண்டும்..

அனைவருக்குள்ளும் பாரபட்சம் இல்லாமல் இறைவன் அவரவருக்குள்ளேயும், வெளியேயும் இருப்பதை உணர்ந்தால் தானும், இவ்வுலகும் அமைதியடையும்.

மனநிறைவு கொள்ள மனத்தை பழக்கினால் போதும்.

அன்புடன் ஜெ.கே

அருட்தந்தை கேள்வி பதில்

வினா: சுவாமிஜி, தாங்கள் சித்தி பெற்று இருப்பது தங்களின் தவ வலிமை அல்லது ஊழ் அல்லாமல் வேறொன்றுமில்லை என்று கருதுகிறேன். மற்றவர்களும் தங்களைப் போல் சித்தி பெறுவது அரிதாகும் என்பது எனது தாழ்மையான எண்ணம்.

வேதாத்திரி மகரிஷியின் விடை: அன்பரே, ஊழ் என்பது முன்பிறவியில் செய்த வினை அல்லது பழவினை என்பதாகும். தவவலிமை என்பது இப்பிறவியில் முயற்சி செய்து பெற்ற உயிர்த்தூய்மை என்பதாகும். தவ வலிமையால் நான் உயர்ந்துள்ளதாக நீங்கள் ஒப்புக் கொண்டல் இப்பிறவியில் நீங்கள் செய்யும் தவப்பயிற்சி வரும் பிறவியில் உங்கள் குழந்தைகளுக்கு ஊழ் வினையாக நலம் தராதா? உங்கள் வினாவிலேயே விடையும் உள்ளதே.

தினம் ஒரு மாற்றம் (17/06/2018)

வாழ்க வையகம்!
வாழ்க வையகம்!
வாழ்க வளமுடன்!!

*தினம் ஒரு மாற்றம்* (17/06/2018)

மனசுக்கு பிடித்தது எல்லாம் செய்யலாமா???

ஒருவருக்கு உணவு (Junk food), புகைபழக்கம், பேருந்தில் நடைபாதையில் நின்று பயணம் செல்வது,
மாற்றான் மனைவி, மாற்றான் கணவர் என்று தவறான மனதுக்குப் பிடித்த உறவுகளுடன் உறவு வைப்பது, வாய் ஓயாமல் பேசி அர்த்தமற்ற சொற்களால் அரட்டை அடிப்பது, விதம் விதமான கண்களைக் கவரும் தரமற்ற. கண்ணியம் இல்லாத உடை அணிவது, பிறர் கவனம் தன் பக்கம் இழுக்க வேண்டும் என்ற பிறர் மன தூண்டுதலின் பேரில் வியாபார மூளைச்சலவை செய்து பொருட்களை வாங்கச் செய்வது...எவ்வளவோ நாட்டு நடப்புகள், வன்முறைகள்.. எல்லாம் மனதுக்குப் பிடித்து செய்யும்  விஷயங்கள் தனக்கும், குடும்பத்திற்கும் சமூகத்திற்கும் சீர்கேடுகளை விளைவிக்கும் இவை எல்லாம் எதற்கு?? சுயமாக சிந்தித்தே தெளிக!!! இவைகளை மனதிற்குள் அனுமதிக்கலாமா???

நன்றாக இருக்கும் ஒரு கணவன் மனைவி உறவுக்குள் குழப்பத்தை ஏற்படுத்தும் ஒரு தவறான உறவு தேவையா??

எதற்கு மனிதன் எல்லாவற்றிற்கும் பேராசைப்படுகிறான் தவறு என்று அறிந்தும்???

*விழிப்புணர்வு* வேண்டும் அனைத்திலும்.

தன்னை ஒருவர் சரியாக கவனித்துக் கொள்ளவில்லை , தன்னை தன் கட்டுப்பாட்டில் வைக்கவில்லை என்றாலே அங்கே ஒழுக்கம் தவறுகிறது என்று பொருள்.

எதற்காக , உணவில், உடையில், பேச்சில், நடையில், செயல்முறைகளில், கற்பில் ஒழுக்கம் வேண்டும் என்று நமது முன்னோர்களும், மகான்களும், சித்தர்களும் வைத்தார்கள்??

தவறுகள் என்பது எண்ணத்திலேயே வேருடன் அழிப்பதற்கும். சிந்தையில் தூய்மையான எண்ணங்கள் மட்டுமே பயணிப்பதற்கும், அனைத்தையும்  தெய்வமாக பார்க்கவும் தான்.

ஒருவரது பிறவித் தொடர் தொடரவும், நீங்கவும், இவையே காரணமாக உள்ளது.

*ஐந்தில் அளவு முறை.... உணவு, உழைப்பு, உறக்கம், உடலுறவு, எண்ணம் இவை ஐந்திலும் அளவு  அதிகமாகவோ, முறைமாறியோ, அலட்சியப்படுத்தியோ அனுபவித்தால்..... அவையே எல்லா சிக்கலுக்கும், நோய்க்கும், காரணமாகும். என்று நமது அருட்தந்தை  வேதாத்திரி மகரிஷி அவர்கள் கூறியுள்ளார்கள்.*

அளவுமுறை எதிலும் அவசியம். அந்த விழிப்புணர்வையும், ஒழுக்கங்களையும், கற்றுத்தருகிறது மனவளக்கலை முழுமைநல நல்வாழ்விற்கான யோகக் கல்வி முறை.

அன்புடன் ஜெ.கே