தினம் ஒரு மாற்றம் (15/06/2018)

வாழ்க வையகம்!
வாழ்க வையகம்!
வாழ்க வளமுடன்!!

*தினம் ஒரு மாற்றம்* (15/06/2018)

"தன்முனைப்பு, பின் முனைப்பு இரண்டால் ஏற்ற முக்களங்கம் எவையென்றால் மெய்மறந்த தன்முனைப்பு, பழிச்செயல்கள், பொருள் மயக்கம் - தளை மூன்றாம், இவை களைந்து உய்யவென்றால் உன் முனைப்பு குறைத்திட்டு உள்ளுள் நாடும் உயிர்த் தவமும் அறநெறியும் சிறந்த பாதை தன்முனைப்பாய் உயிர்நாட்டம் திரும்பி விட்டால் நாள்தோறும் விடுதலையின் இனிமை காண்பாய்."
- அருட்தந்தை வேதாத்திரி மகரிஷி அவர்கள்.
ம.வ.க 1
( பக். 107)

பற்று என்பதை பற்றிக் கொண்டு இருந்தால் மற்றவை எல்லாம் கண்களுக்குப் புலப்படாது.

*பொருள் பற்று,* என்பது இது என்னுடையது..
என்பதும் நான் அதை ஒருபோதும் பிறர் அனுபவிக்கக் கொடுக்க மாட்டேன்... என்பதும். என்னிடம் மட்டுமே இது இருக்கும் என்பதும். தான் அதை பயன்படுத்தாமல் இருந்தாலும் இருப்பேன். ஆனால் அதை பிறர் அனுபவிக்க ஒருபோதும் அனுமதிக்க மாட்டேன் என்பதும் பொருட்களின் மேல் உள்ள தீவிரப் பற்றுதலை குறிக்கும். இவ்வாறான தீவிரப்பற்று தீய செயலை செய்யத் தூண்டும்.

*அதிகாரப்பற்று* என்பது நானே பெரியவன் என்கிற அகங்காரத்துடன் வாழ்வது.. மற்றவர்கள் எல்லாம் எம்மாத்திரம் என்று ஏளனமாக நினைப்பது. தனக்குக் கீழ்  மற்றவர்கள் அடிமையாக மட்டுமே இருக்க வேண்டும் என்று நினைப்பது.

பிறரின் உணர்வுகளுக்கும், மதிப்பும், மரியாதையும், கொடுக்காமல் வாழ்வது. தான் சொல்வதே சரி.. என்பதும் தனக்கு மட்டுமே எல்லாம் தெரியும் என்று இருமாப்பில் தலைகால் புரியாமல் ஒரு செயலை செய்வது, தான் எடுக்கும் முடிவே சரி என்று எண்ணுவது. பிறரின் எண்ணம், சொல், செயல்களைதட்டிக் கழிப்பதும்...
தனக்குக் கொடுக்கப்பட்ட வேலையில், அதிகாரத்தில் சரி எது, தவறு எது, என்று ஆராயாமல் சுய சிந்தனையே இல்லாமல், கண்மூடித்தனமாக, பிறரைக் கொடுமை படுத்துவதும்...
அதிகாரப் பற்றின் உச்சம்.

இவை எல்லாம் ஏன் நிகழ்கின்றன...?

பேராசையே காரணம்.
உலகில் சுயக்கட்டுபாட்டோடும், சுய ஒழுக்கங்களோடும் ஒருவர் வாழ்ந்தால் பற்றுதல் அளவுமுறையோடு நிற்கும்.

எண்ணுபவை, பார்ப்பவை, கேட்பவை, செய்பவை, அனைத்தும் தன் மனதிற்கும், பிறர் மனதிற்கும், நன்மையாக இருக்குமாறு கவனத்துடன் இருந்து கொண்டால் அனைத்தும் பிரபஞ்சத்திலிருந்து பிரதிபலிக்கும்.

அனைத்து உயிர்களையும் பொருட்களையும் ஒருவர் தெய்வமாகப் பார்த்தால் அந்த உயிர்களும், பொருட்களும், நம்மையும் மதித்து நல்லிணக்கத்துடன் இருக்கும்.

பொருள் பற்று, அதிகாரப் பற்று என்பது ஒருவரின் குணநலன்களுக்கும் மனநலன்களுக்கும் கேடு விளைவிப்பவை என்று உணர்ந்தால் அனைவரிடமும் அன்பு தோன்றும்.

அன்புடன் ஜெ.கே